De ganzen Doku-Soaps und "scripted realities" bei de Privatsender: Mir glangt 's mit dem Glump, wo se harmlose, liabe Leit mit da Aussicht, im Fernsehn zoagt zu werdn, zum Bestn gebn. I konn des Zeig nimma seng! I hob as richtige Lebn, wenn in "meim" Glockenbachviertel zum Eikaffa geh: De letztn Oideigsessna lodn ei zu am Ratsch; ma gfreit se, wenn ma se sigt. Und aa wenn Manche goar ned interessiert, wos i seiwa zum sagn hob und sie vazähln und vazähln - und i hör zua und hör zua. Und woaß irgendwann, in meiner Küch as Wasser fia mein Kaffee auf da eigschoitna Herdplattn is gwieß scho fast vadampft: Des is wurscht! Weil des vadampfte Wasser konn i nochfuin, aber koan oanzigen Aungblick Begegnung mim richtigen Lebn!
As echte Lebn
- Details
Kommentar schreiben
Theresia Schneizlinger is a waschechts Münchner "Gwachs". I kenn sie scho ewig lang und mog ihrn trockena Humor und sogar ihra Grantln. Sie steht mit manche moderne Sachan auf Kriagsfuaß, weil klar: "Friahra war fast oiss besser!" Aber sie is durchaus tolerant, solang jemand a anständiger Mensch is oder oana, der im Biergarten ned scho noch da zwoatn Mass unterm Tisch liegt. D' Schneizlinger nimmt koa Bladl vor'n Mund, wos ned jedm gfoit. Aber des is ihra wurscht, sie moant: "I sog ja nix, i moan ja bloß!" As Internet is ned so ihr Ding, oiso überdrog i ihre mit der Hand aufgschriebna Erlebnisse und Gedankn aus'm Oidog in den Blog. A Foto vo sich wui s' ned im Web, desweng is des Buidl mit KI gmacht; kummt ihra aber scho recht nah. Ab und zua daucht d' Schneizlinger aa in an Sketch vo mir auf; d' Erlaubnis vo ihra hob i natürli!