Lösungsmittel

Mei -nix konn i, nix bin i.
Manchmoi glaab i, spinn i.
I bin so schiach, so deppert,
wia se oa Dreck zum andan läppert.
Moment: fia soiche Psychosuppn
gibt s Seibsthuifegruppn.

Da Jamsterer is ganga - fremd.
Wia se d valetzte Seele stemmt:
Der Saukerl, so a gscherter Hund!
Wia a ma feiht, Stund um Stund.
Mi hauts so rum, kumm ned klar
- i brauch a Seminar.

Wieda net highaut, nix worn.
Daß s wos werd, häd i gschworn.
Warum meng de nia wia i?
Dua doch oiss fia sie.

Is mei beste Zeit scho gwesn?
Hob do vo am Workshop glesn.
Wos soi i bloß doa?
Kumm ned zruck und ned vor.
Is s z friah oda scho z spät?
Vielleicht bin i einfach z bläd?

Es huift oiss nix mehr -
do muaß a Coaching her.

Hod oiss kost 6.000 in bar.
I bin bliebn, wer i war.
Es häd wos Billigas gebn:
nemma, wia s kummt - as Lebn.