Ratgeber

Ma mecht wos doa, denkt umanand,
macht se an Plan, der hihaun kannt.
Bevor ma loslegt, mecht ma gern
de Meinung vo Bekannte hern.
Se vergewissern, ob s so paßt
und se in d Tat umsetzen laßt.

Da erste wählt an Slalomkurs:
"Ja, ja, des hod scho Hand und Fuaß.
Im Kern is des a guader Plan,
wenn aa Details no offen sann.
Vastehst mi do scho recht:
Ned daß i Dir obratn mecht."

Da nächste is voi überzeugt:
"A Riesensach, wenn de moi steigt!
Genau so muaßt d as macha.
Ziags durch! Laß s sauber kracha!"

A dritter sogts oam grod ins Gsicht:
"Na, des is koa guade Gschicht!
Des is a Schmarrn, laß liawa bleim.
Des werd nix, konn i unterschreim."

No oana sogt: "I woaß ned,
ob des oiss so einfach geht.
I konn dazua ned sehr vui song,
miassast jemand andern frong.
I wui a Wertung aa vameidn:
Letztlich muaßt a s Du entscheidn."

Noch so am Irrgang merkt ma wieder:
As einge Gfuih is s Auf und Nieder.
Drum frogt ma liawa erst um Rat,
nochdem ma se entschiedn hod.