Auf dera Webseitn findn S' so kaum wos auf Hochdeitsch. Zuagroaste und Möchtegern-Münchner wern oiso gewisse Probleme hom. Oder sie bstein a Übasetzung ins Hochdeitsche; des kost aber wos... Bloß wichtige Erklärunga hob i in Hochdeitsch gschriebn. Und glei am Anfang des Wichtigste: Bairisch is koa Dialekt, sondern a Einzlsprach noch ISO 639-3: Konn ma nochlesen auf Wikipedia
Zwoatns miassn S' an Humor hom, wei "auf guad münchnerisch" is mei Spuiwiesn fia meine seiba gmachtn Gedicht und andam teilweis gschertn Gschreibsl. Wobei "gschert" in München (und Bayern) ned mit "gemein" oder "verletzend" zu übasetzn is, sondern mit frotzelnd, ironisch - oder so ähnlich.
Drittens brauchan S' fia a untahoitsams Vaweiln auf meiner Webseitn auf jeden Foi an dreistlligen IQ. Sie wissn ned, wos a "IQ" is? Des is jetz bläd... Nacha sann S' bei Twitter und dem andan Schmarrn vielleicht doch besser aufghobn.
Und no wos zur Schreibweis: Wia ma jetz in Münchnerisch/Bairisch richtig schreibt, do gibt s vaschiedne Meinunga. Wos i auf jedn Foi ned mach: Fia jedn Buchstam, der im Münchnerischen/Bairischen ausglassn werd, a Apostroph hi zum schreibn. Weil des konn koana mehr lesn!
Oisa nacha: Vui Gspaß und guade Untahoitung!
Bin 1959 geborn in München und a waschechte Münchnerin: Bis auf oan Ausreißer (a Niederbayer) warn olle Vorfahrn bis zu de zwoaseitign Großeitern zruck Münchner. Und natürli leb i in München - seit 1990 im Glockenbachviertel.
As Münchnerische und da Münchner an sich sann im Aussterbn begriffa. Fia Viecher, de aussterbn, gibts an World Wildlife Fund und anderne Organisationa. Aber fia uns Münchner - nix!